इमानसिंह राइ
वापुन वालिम कि वाचुङ सोनचिदा
वाहिपओ वेन तायुङ ओको लेनचिदा
निनाम्मादु वासाम ओयामोया हुयाङ्सा
वाताकि वाहिपदा हेन्खामा वा होम्याङ्सा ।
वाहिप सुम्का सोनचि मयुङ्याङ पेलेले
कोन्मा ठाङ्मा मपनिनिन वाताकि झेरेरे
वासाम ओयामोया टोमलुक चाअ्वा खोन्सा
वा तासुङु ढानाढाना नाम्चोकदु लोन्सा ।
वाहिपओ लेनचिदा साफिङा वा तायाङ
काचिमुसि झाराक खिमदा मलातायाङ
वाताकि झाराक चासुमि काचिदा लोन्टिन
बाखादा चासुम सिसा खिम्पाङ केन्टिन ।
वाआ वाढाङ्चि छङ्छङ यङ्सा मधायाङ
होङ्कु याङ्वाचि गडङ्डङ चसा मढुप्याङ
बेङ्सिचिदा मदम वाङ्याङ्सा मभेप्याङ
मदमआ अनुनु कायाखाचि मपोन्याङ ।
वाहिपदा ताओ वा ओको बाखादा माखात
चासुमि झाराक काचिमुसि बेङ्सि मखात
बेङ्सिओ काचिदा फा मुन अक भोम लियाङ्सा
असारे छाम लुन्ने माखाराओ लाम्याङ्सा ।
वाहिप बेन काचिदा लोन्टिन हेङ्सा–हेङ्सा
वाताओ योक्दा चासुमि लोन्मा वाछेक्रि बोम्सा
वारिसा छाचि काचि ममु हिलोआ वेन्मुसा
अनुनु काचि सोत्याङ चुत मुसा चुत मुसा ।
बाउसे आलि पाक्सा हलि हारा बोक्याङ्सा
कालित्माचि काया मलित गफा मोक्याङ्सा
ढाउखिम ह्युखिम फामुसा युङिन टेनदा
काया लित्सि ढामादोत ओहिप खिमभेन्दा ।
वाहिपदाङा व़कभेप्लो साम्पिचा लित्मा
झाराक्साआ काचिमुमा अनुनिन छित्मा
आइमित काचि छित्सा अनुनिन खा खाङ्मा
तुम्दिओ चासुम चासुम्ला सोन्दा वाङ्मा ।
आमचोक ३, थिदिङ्खा, भोजपुर
बुङ्वाखा, इखिप १८५ दाङ्का
