सुक्र बान्तावा
खादा–खादा खारिन कोलिन्कि खिमओ
बुक्लुङ्दा मान्तामाङ्ङा मिन्तुम्ओ कि
बुत्तुम्ओ बुदाओ मना मामा
तुइन हेदा ओक्टो तारुकि आन चक्दा
युङ्सा पयाङ्सा आन टाङ मसोप्याङ हेदा
मामाओ छुक्आ टउखाइसु कि नुन्येन ।
वक्दा मसियाओ खान, चासुमचि
भाङ्सुकि मामाआ मपुवाओ बेन
देम चानुलो चानुयाङ
मामा मात्दङ्ओ बेनदा वक्दा
खान चासुममि मसिया निछाङ
मामा युङाङाकि चानुलो लुवाङा
खोन्किङा दि मपुवा निछाङ मामाओ
छुकदाकाङ चामायु खानचि चा मनुवाङा
अङ्का सिन्मा मान्रदोङओ नुत्छेओ दुम
मामाआ भाङ्सुकि मपुवाओ चानुवाङा
आप्पिओ छाचिओ इप्मा तादेङ
मामाओ छाङ इप्मा ताओ
छाचिओ बुक खादेङ बुक खाओ
छाचिओ चाअत्मायुदा चानुमादा छाङ
अक्नि मिन्मा युङ्ओ मामाओ मिन्मा ।
ओन हेन्खामादा मामाआङा
सावा काछाप लिसाओ ओन्देलो
हेन्खा छाचिआ चाअत्मायु नितोक्निन
मामा युङ नालो दाब्बेदा छाङ मि लेत
खिमदाङा उप्मि दात्युङ
चामायु चासुमचि मसक्याङ मयाक्याङ
छेमा कात्ओ वाको हुम्मायु वात्मायुचि खान मनुयाङ ।
बुङ्वाखादा बुङ्चि छाङ
खालाक–खालाक मबात्युङ
खिम साक्सिवाचिछा खिमदा मयुङ्याङ
माङ्खिमदा छाङ विहिरि, मानिकेन
दोङ, तुङ्नाचि एन्नुलो मसाङ्याङ
मामा युङकिङा छाप्दुमि झेरेरेमा
युन्वा चोमोलुङ्मा युङ्याङ
नङ्नु साया, डिवाडिमा
साकेन्वादा ढियालुङ
थाप्सङ कि रिदुमपादुम युङ्याङ ।
मामा मात्दङ्ओ लेनदा
मिन्मा देम्ओ देम तुक्याङ
मामा मात्दङ्ओ बेनदा
हेन्खामाङा कुइयामाआ माकाचक
मामा मात्दङ हेदा
हेन्खामा निनाम्मा झारा मखाप्याङ ।
आमचोक ४, भोजपुर
बुङ्वाखा-१८४ दाङ्का
