राजेन्द्र राइ
सोम्नुदाङ्का सोम्तुक मेत मुसा
हितामादा हिदुक मान्तुक
सुप्तुलुङ्दा सेवा मुयाङ्सा
सिलिचोङओ ऩङ बुत्याङ्सा
हेन्खामा निनाम्मादा देम्ओ देम ।
नाम्चिम्पिलेक कुलुङ्ढिप्पा पाराङा हेदा
ढिलाम होत्सा ऩङ्नु लोक्सा
सुन्तुम दिवा सुन्तुम दिमाओ
थाप्स़ङ लाम्याङ्सा अनु मामाय़ङ काहान
अ़ङ्का बाखाछा
पापा–मामाच्यो छुट्पाछा
मोप्ङाङा हे रोप्ङाङा
खात्नि अ़ङ मिन्मा हुयाङ हे
अ़ङ खारु फोम्याङ ।
सिन्मा मान्ऱङा तुप्मा मान्लेङा
सेङ्कोङ्कोङ्वाओ हाङ्पोक
ढिवाङ मिन्मा
खात्नि कोङ्तुप कि
मिन्मा फियाङ हे
काचि फियाङ
साप्टेन सोहोन किरावादाओ
दाब्बे फियाङ हे
माङ्लेङ्मा लियाङ
दित्छाङ असिन्ऩङ
नुच्छे अछ़ङ अ़ङ्का बाखाछा
कुहिप इप्सा दोङ दोङ्सा
मामाय़ङ मिचिदुमओ
मिन्मा लाम्सा
आराङ्माङओ दोवादुम
छाप्अ़ङ्वा छाप्कामि दोङ्दुमओ
सान्लाबोप सालामभुङ
तुप्य़ङ तुप्याङ्सा
मामाय़ङ हान्मा स़ङा ।
कुह़क्मिचि मित्याङ्सा
मुन्दुमदा माङ्छामा माङ्य़ङ
पोन्मा हामादा बोप्खावा
सोलोन्वा मान्लि हे
सुबिचोङ ए मान्ता
मामाय़ङओ य़ङ्पेन्कि
ताया तुप्वा मान्लेदामा
अ़ङ्का खावाको किरावा
दुखुप्दाङा हे…?
वापा ओक्टाचिआ
अवाय़ङओ नाम्साम ओन्कि
लेन फान्टा, बेन फान्टा
सोन फान्टा, दोङ छाङ फान्टा
क़ङ्याङ्ओ ङेन्बोप छाङ
खोन्नु छाङ मिन्मा मान्फान
इम्साङ्याङ्ओ अ़ङ्का
ओको लोङ्द़क्पा
राक्काभाला थिन मेत्ताङ्च़ङ
अ़ङ्का आम्नोछा ओ योक्दाओ बाखाछा
दिबुङ्ला, चफुक्ला, वासेप्ला, खेरेक्ला
झोरालाओ लाम कोन्याङ्सा
झाराक साप्टेन कि
लुलेन सेङ्याङ्सा
साप्टेनदा बान्मा स़ङा हान्मा स़ङा
बुङ्वाखादा तामा स़ङा
सान्युङ का़प सान्दिवानान
सावेत मुसा ढिलाम होत्सा
साकेन्वाओ ऱङ्मु लुसा
झाराक्चिदा सेवा मुसा
यावाचिदा सोम्तुक मेत मुसा ।
धरान, सुनसरि
(पछुकाउ बान्तावा सालाम छोमासि काचिपेन टप १५ दा छुक्टाओ सालाम कि बुङ्वाखा इखिप १८३ दा छापे लिसाओ याआङ ।- टोङ्कामि)
